काठमाडौ । चलचित्र बुलबुल फागुन ३ गतेबाट देशभर प्रर्दशनमा आउदै छ । यसै चलचित्रको पहिलो गीत ‘खुद्राखुद्री’ विहिबार सार्वजनिक गरिएको छ । गीत रिलिजका लागी निर्माण टिमले नयाँ शैली अपनाएको छ ।
काठमाडौ मल अगाडि दिनको ४ बजे नायिका स्वस्तिमा खडका र नायक मुकुन भुसाल तथा अन्य कोरस डान्सरहरु नाचेर गीत रिलिज गरिएको छ । फ्ल्यास मोब शैलीमा रिलिज गरिएको गीत रिलिजमा भिड भाडमा रहेका कलाकार अचानक गीत बजेसँगै एक जुट भएर नाचेका थिए । भक्तपुरको हेलमेट डाँडामा पच्चीस वटा टेम्पो र १०० जनाको कोरससहित ४ दिन लगाएर खिचिएको गीतमा १८ लाख खर्च भएको निर्माण टिमको भनाई छ । यस गीत काठमाडौको काठमाडौं मलसँगै पोखराको चिप्लेढुंगा चोक, बुटवलको ट्राफिक चोक, नारायणघाटको नारायणी किनार र बिर्तामोडको हनुमान कम्प्लेक्समा पनि एकै समयमा अन्य डान्सरहरु नाचेर रिलिज गरियो ।
विनोद पौडेलले निर्देशन गरेको चलचित्रमा स्वस्तिमा खडकाका, मुकुन भुसाल, बुद्धि तामाङ, दिपक क्षेत्री, लक्ष्मी बर्देवा, जोयश पाण्डे, उज्जल अधिकारी, सृष्टि भट्टराई लगायतका कलाकारको अभिनय रहेको छ । चलचित्रमा स्वस्तिमा एक टेम्पो चालक युवतीको भूमिकामा देखिएकी छन् ।
यो समाचार नयुज २४ नेपालबाट लिईएको हो।
