काठमाडौं । निर्माता तथा कलाकार सन्तोष सेनले केही साता अघिनै सुपरहिट फिल्म ‘प्रेमगीत’को तेस्रो सिरिज ‘प्रेमगीत–३’ निर्माणको घोषणा गरिसक्नुभएको छ । निर्माता सेनले यसै वर्षको चैत २८ गतेबाट दर्शकमाझ रिलिज गरिने जानकारीसहित ‘प्रेमगीत–३’ निर्माणको घोषणा गर्नुभएको हो ।
निर्माता सेनले ‘प्रेमगीत–३’ फिल्मको मुख्य अभिनेत्रीको खोजी गरिरहनुभएको छ । उहाँले यस प्रोजेक्टको मुख्य अभिनेत्री अडिसनमार्फत छनौट गरिने जानकारी गराउनुका साथै अडिसनको आह्वानसमेत गर्नुभएको छ । ‘प्रेमगीत–३’ को लागि एक जना मुख्य अभिनेत्रीलाई अडिसन मार्फत छनौट गरिने भएको हो ।
उहाँका अनुसार यो फिल्मको मुख्य अभिनेत्रीको लागि विश्वभरबाट अडिसनमा सहभागी हुन पाउनेछन् । अडिसनमा भाग लिन चाहने इच्छुकहरुले डब्लुडब्लुडब्लु डट आसुसेन फिल्मस् डट कम () मा भिजिट गरी फारम भर्न सक्नेछन् । साथै आसुसेन फिल्मसको इमेल () मार्फत पनि सम्पर्क गर्न सकिने निर्माता सेनले जानकारी गराउनु भएको छ ।
अडिसनमा सहभागी हुनका लागि प्रतिस्पर्धीहरुले भर्खरै खिचेको चारप्रति स्पष्ट अनुहार देखिने फोटोसहित आफ्नो बायोडाटा पठाउनुपर्नेछ । साथमा प्रतिस्पर्धीहरुको उचाई ५.२ इन्च देखि ६.७ इन्च सम्मको हुनुपर्नेछ । उमेरको हकमा १८ वर्षदेखि २५ वर्ष ननाघेका हुनुपर्ने निर्माता सेनले जानकारी गराउनुभएको छ ।
इच्छुक प्रतिस्पर्धीहरुले आगामी जेठ १० गतेसम्ममा सम्पर्क गरिसक्नुपर्ने निर्माण टिमले जनाएको छ । आइसकेका आवेदनहरुमध्येबाट २० जनालाई फाइनल अडिसनका लागि छानिने छन् । सोही २० जना प्रतिस्पर्धीहरुबाट छनौट हुने एक जनालाई ‘प्रेमगीत–३’को मुख्य अभिनेत्रीको रुपमा डेब्यु गराइने निर्माता सेनले जानकारी दिनुभएको छ ।
‘चंखे शंखे पंखे’, ‘प्रेमगीत’, ‘प्रेमगीत–२’ र ‘मेरी मामु’ पछि पाँचौं प्रोजेक्टको रुपमा ‘प्रेमगीत–३’ निर्माणमा जुटिरहेका निर्माता सेनले विगत १ वर्षदेखि स्क्रिप्टको काम भइरहेको जनाउनुभएको छ । अबको दुई साताभित्र यस प्रोजेक्टको स्क्रिप्टको काम र मुख्य कलाकाहरु फाइनल गरिसक्ने बताउनुभएको छ ।
उहाँले आसुसेन फिल्मसको ब्यानरमा बनेका पहिलेका फिल्महरुको तुलनामा ‘प्रेमगीत–३’ लाई अझ बढी मेहेनत गरेर दर्शकमाझ ल्याउने जानकारी गराउनुभएको छ । फिल्ममा ३÷४ सय वर्ष पूरानो (हाम्रो बाजे र बराजुको पालाको) कथालाई प्रस्तुत गरिने निर्माता सेन बताउनुहुन्छ ।
यो फिल्मलाई निर्माता सेन र ‘डमरुको डण्डीबियो’फेम निर्देशक छेतेन गुरुङले निर्देशन गर्नुहुनेछ । यसै फिल्मबाट निर्माता सेनले निर्देशकिय यात्रा पनि सुरु गर्दैहुनुहुन्छ । त्यसोत, यसै फिल्मको दोस्रो सिरिज ‘प्रमगीत–२’मार्फत उहाँले अभिनयमा पनि हात हाल्नुभएको छ । ‘प्रेमगीत–३’को कथा निर्देशक छेतेन गुरुङकै रहनेछ ।
यो समाचार नयुज २४ नेपालबाट लिईएको हो।
