काठमाडौं । वरिष्ठ गायक भीम तुलाधरको नयाँ गीत ‘दोष’ को म्यूजिक भिडियो सार्वजनिक भएको छ । आज जूममार्फत् गरिएको भर्चुअल कार्यक्रममा वरिष्ठ गायक ओमविक्रम विष्टले गीतको भिडियो लोकार्पण गरे ।
कार्यक्रममा नेपालमै पहिलो पटक जूममार्फत भर्चुअल कार्यक्रम गर्दै गीतको प्रिमियर भएको दावी गरिएको थियो । म्यूजिक भिडियो गायक तुलाधरकै युट्युब च्यानलमार्फत सार्वजनिक गरिएको छ ।
कार्यक्रममा बोल्दै पप सम्राट विष्टले ‘दोष’ गीतको अडियोको साथमा म्यूजिक भिडियोसमेत निकै उत्कृष्ट बनेको विचार राख्दै सफलताको शुभकामना दिए । नेपाली पप संगीत क्षेत्रको स्तर कायम राखिराख्न तुलाधरको ठुलो योगदान रहेको चर्चा विष्टले गरे ।
गायक तुलाधरले आफूले निकै मेहेनत लगाएर गीत बनाएको बताउँदै अब गीतको मूल्याङ्कनको जिम्मा दर्शक र श्रोतालाई दिएको बताए । ‘हाम्रै नेपालभित्र सुटिङका लागि थुप्रै राम्रा, मनमोहक स्थानहरु छन् । हामीले यस्तै आकर्षक, मनमोहक ठाउँहरु खोजी खोजी गीतको भिडियो तयार गर्यौं’, तुलाधरले भने, ‘हामीले नेपालको प्रकृतिलाई चिन्न सक्नुपर्छ ।’
म्यूजिक भिडियोको परिकल्पना बनाउनुका साथै निर्देशन रवि सायमीले गरेका छन् । भवानी शिलाकारको छायाङ्कन निर्देशनमा ड्रोन पाइलट प्रशन्न महर्जनले ड्रोन चलाएका छन् । मोडलद्वय निरोज शाक्य र आराध्यलक्ष्मी खड्गीले आफ्नो अभिनयको प्रतिभा प्रस्तुत गरेका छन् ।
यो समाचार नयुज २४ नेपालबाट लिईएको हो।
