काठमाडौं । कोरोना महामारी रोकथाम तथा न्यूनीकरणका लागि लागू गरिएको निषेधाज्ञाका कारण चलचित्र प्राविधिकहरु बढी समस्यामा परेको भन्दै अभिनेत्री स्वस्तिमा खड्काले सहयोगको अपील गरेकी छन् ।
अभिनेत्री स्वस्तिमा खड्काले सामाजिक सञ्जाल फेसबुकमा भिडियो सार्वजनिक गर्दै समस्यमा परेका चलचित्र प्राविधिकहरुका लागि सहयोगको अपील गरेकी हुन् ।
अभिनेत्री स्वस्तिमाले कोरोनाको विषम परिस्थितिमा पनि सरकारको प्राथमिकता चलचित्र उद्योग नपरेको उल्लेख गर्दै चलचित्र निर्माण ठप्प भएको बताएकी छन् ।
चलचित्र निर्माण ठप्प हुँदा सबै भन्दा बढी प्राविधिकहरुलाई समस्या भएको उल्लेख गर्दै उनले भनेकी छन्, ‘प्राविधिकहरुलाई छाक टार्नसमेत समस्या भएको खबर पढ्दा म निकै भावूक भएकी छु ।’
सबै प्राविधिकहरुलाई समस्या नभएपनि स्पट ब्वायहरु बढी समस्यामा रहेको उल्लेख गर्दै स्वस्तिमाले सबैले सकेको रकम सहयोग गर्दा पनि ठूलो हुने बताएकी छन् । स्वस्तिमाले प्राविधिकहरुलाई सहयोग गर्नका लागि ९८४१०१७७६४ नम्बरको ईसेवा आईडीमा रकम पठाउन सकिने जनाएकी छन् ।
यो समाचार नयुज २४ नेपालबाट लिईएको हो।
