काठमाडौं । बलिउड उद्योगमा अभिनेता आमिर खान र सलमान खान स्टारर् फिल्म ‘अन्दाज आपना आपना’लाई एक आइकोनिक क्रियशनको रुपमा मानिन्छ । यो फिल्ममा सलमानले ‘प्रेम’ र आमिरले ‘अमर’को भूमिका निभाएका थिए । फिल्ममा सलमान र आमिरले दर्शकहरुलाई खुब हँसाएका थिए ।
बक्स अफिसमा फिल्म सुपरहिट बनेको थियो । क्रिटिक्सले पनि फिल्मको कहानीलाई असाध्यै रुचाएका थिए । भर्खरैको एक रिपोर्टमा मेकर्सले यो फिल्मको सिक्वेल बनाउने तयारी गरिरहेको छ । साथै यस सिक्वेल फिल्ममा रणवीर सिंह र बरुण धवनलाई कास्ट गरिने बताइएको छ ।
डेक्कान क्रोनिकललाई एक अन्तर्वार्ता दिँदै फिल्मका लेखक दिलिप शुक्लाले भने, ‘अहिले फिल्मको कहानीको काम भइरहेको छ ।’ फिल्मको सिक्वेलको कहानी लेख्न सजिलो नहुने बताउँदै उनले भने, ‘मैले सिक्वेललाई पहिलो फिल्मको तुलनामा धेरै गुणा बढी आकर्षित बनाउने प्रयास गरिरहेको छु ।’
लेखक दिलिपले थपे, ‘‘अन्दाज आपना आपना’को सिक्वेल सलमान र आमिर खान बिना सम्भव हुँदैन । सलमान–आमिर बिना यस फिल्म पूरा हुँदैन । त्यसैले यो फिल्ममा तीन जना नयाँ स्टारकास्टको साथमा उनीहरु देखिनेछन् ।’
१९९४ मा दर्शकमाझ रिलिजमा आएको यो फिल्ममा सलमान र आमिरसँगै करिश्मा कपूर, रविना टण्डन, परेश रावल र शक्ति कपूर लगाएत मुख्य भूमिकामा थिए । फिल्मलाई राजकुमार सन्तोषीलेनिर्देशन गरेका थिए ।
अहिलेको समयमा अभिनेता आमिर खान ‘लाल सिंह चढ्डा’को तयारीमा जुटेका छन् । यो हलिउड फिल्म ‘फरेस्ट गम्प’को हिन्दी रिमेक हो । यसै फिल्मको लागि आमिरले पुनः आफ्नो वजन घटाएका छन् ।
अर्का अभिनेता सलमान खान भने दबंग–३ को सुटिङमा ब्यस्त छन् । फिल्मलाई प्रभु देवाले निर्देशन गर्दैछन् । यो फिल्म १९ डिसेम्बरबाट दर्शकमाझ रिलिजमा आउँदैछ ।
यो समाचार नयुज २४ नेपालबाट लिईएको हो।
