काठमाडौं, ११ साउन । निर्माता, निर्देशक एवं कलाकार सन्तेष सेनले फिल्म ‘प्रेमगीत–४’को तयारी सुरु गर्नुभएको छ । कोरोना महामारीका कारण सर्वाधिक पर्खाईको फिल्म ‘प्रेमगीत–३’ दर्शकमाझ रिलिज गर्न नपाएका सेनले ‘प्रेमगीत–४’ निर्माणको तयारी सुरु गर्नुभएको हो ।
‘प्रेमगीत४’को लागि निर्माता/निर्देशन सेनले अभिनेता प्रदीप खड्का र अर्का निर्देशक छेतेन गुरुङसँग मिलेर कथाको तयारी गरिरहनुभएको छ । उहाँका अनुसार कथा सकिने बित्तिकै कलाकार र प्राविधिक छनोटमा गरिने भएको छ ।
उहाँले पर्खाईको फिल्म ‘प्रेमगीत ३’को रिलिज लगत्तै छायाँकनमा जाने योजना अनुसार ‘प्रेमगीत–४’को तयारीमा लागेको बताउनुभयो । उहाँले भन्नुभएको छ, ‘‘प्रेमगीत–४’ को तयारीमा बसेका छौं । प्रेमगीत–४ आइडियामा काम भइरहेको छ ।’
त्यसोत, निर्माता सेनले लकडाउनमा विभिन्न सामाजिक सेवासँगै अर्को नयाँ फिल्मको पनि तयारी गर्नुभएको थियो । उहाँका अनुसार कमेडी लभस्टोरी रहेको उक्त फिल्मको पनि अहिले छायाङ्कन तयारी सकिएको छ ।
अब सर्वाधिक पर्खाईको फिल्म ‘प्रेमगीत–३’ रिलिजसँगै दुवै फिल्म एकसाथ छायाङ्कन गरिने निर्माता सेनले जानकारी दिनुभयो ।
सेनको बहुप्रतिक्षित फिल्म ‘प्रेमगीत–३’मा प्रदीप खड्का, क्रिष्टिना गुरुङ, शिव श्रेष्ठ, सुनिल थापा, सन्तोष सेन, माओत्से गुरुङ, मनिष राउत, पुष्कर कार्की, प्रेम पुरी, अनुभव रेग्मी, योगिशा खत्री, समृद्धि शाही ठकुरी, कृजन गौतम, जीव बराल, जीवन भट्टराई, लक्ष्मी बर्देवा, सुजल बस्नेत, राज थापालगायतको मुख्य भूमिका रहेको छ ।
यो समाचार नयुज २४ नेपालबाट लिईएको हो।
