काठमाडौं । गोपीकृष्ण मुभिजको फिल्म ‘माइकल अधिकारी’को अफिसियल ट्रेलर सार्वजनिक भएको छ । सौगात मल्ल र श्रृष्टि श्रेष्ठ स्टारर् ‘माइकल अधिकारी’लाई रञ्जित रौनियारले निर्देशन गरेका हुन् । फिल्मको कथा पनि निर्देशक रौनियारको आफ्नै रहेको छ ।
फिल्मको सार्वजनिक ट्रेलरमा कोख भाडामा लिएर बच्चा जन्माउने विधि (सरोगेसी)को कथावस्तुलाई प्रस्तुत गरिएको छ । पैसाको लागि आफ्नो श्रीमतीलाई बच्चा जन्माउन अनुमति दिने मुख्य पात्रको कथालाई निर्देशक रौनियारले कमेडी र इमोसन दुवै भाव प्रस्तुत गरेका छन् ।
फिल्मलाई निरक पौडेलले निर्माण गरेका हुन् । सन् २०१५ को कथावस्तुमा ‘माइकल अधिकारी’को सुटिङ गरिएको र सरोगेसी आमाको सोच विचारलाई फिल्ममा समेटिएको निर्माता पौडेलले बताए ।
केही दिन अगाडि मात्रै ट्रेलर सार्वजनिक कार्यक्रममा उपस्थित अभिनेत्री श्रृष्टिले प्रायः आफू शान्त पात्रमा देखिएता पनि यस फिल्ममा भिन्न चरित्रमा रहेको बताइन् । दर्शकहरुले आफूलाई भिन्न आयाममा खोजी गर्न पाउने उनको भनाइ थियो ।
फिल्ममा सौगात र श्रृष्टिसँगै अशान्त शर्मा, लूभिना तुलाधर, एन्नी कुँवर, हेमन्त बुढाथोकी, विद्या कार्की, जेमिमा टोम्स, दीलिप बोहोरा, केन्द्र भट्टराईलगायतको अभिनय रहेको छ । यो फिल्म भदौ तीन गतेबाट दर्शकमाझ रिलिजमा आउँदैछ ।
यो समाचार नयुज २४ नेपालबाट लिईएको हो।
