काठमाडौं । विराज भट्टको आगामी फिल्म ‘साङलो’को नयाँ गीत सार्वजनिक भएको छ । फिल्ममा समावेश गरिएको राजनराज शिवाकोटी र मिलन नेवारको आवाजमा गरेको ‘चरीले काफल’ गीतको भिडियो सार्वजनिक गरिएको हो ।
सार्वजनिक ‘चरीले काफल’ गीतमा राजनराज शिवाकोटीको शब्द÷संगीत रहेको छ । गीतलाई राजन निशानले एरेञ्ज गरेका हुन् ।
गीतको भिडियोमा फिल्मका मुख्य अभिनेता विराज भट्ट र निकिता चाण्डक फिचर्ड छन् । भिडियोमा उनीहरुलाई रोमान्टिक अवतारमा देख्न सकिन्छ ।
विराज भट्टको यसै ‘साङलो’ मार्फत पूर्व मिस नेपाल निकिता चाण्डकले आफ्नो करियर सुरु गर्दैछन् । फिल्ममा विराज र निकिताका साथमा जयनन्द लामा, कामेश्वर चौरासिया, प्रकाश शाह, आरपी पन्त, लय संग्रौला, शिशिर भण्डारी, रमेश सोडारी, भिष्म जोशी लगाएतको मुख्य भूमिका रहेको छ ।
फिल्मलाई विराज भट्ट आफैले एक्शन–कट गरेका हुन् । मान कृष्ण महर्जनले छायाङ्कन गरेको ‘साङलो’लाई शिबराम अधिकारीले लेखेका हुन् ।
फिल्ममा श्री श्रेष्ठको एक्शन र अर्जुन जिसीको सम्पादन रहेको छ । माघ २४ बाट यो फिल्म दर्शकमाझ रिलिजमा आउँदैछ ।
यो समाचार नयुज २४ नेपालबाट लिईएको हो।
